Mangtha ka ti ta a..

Sahmulphah thla, chawlhkar thumna, Thawhtanni ni tak ani a, zinglam a ruahsur chuan Trivandrum khawpui chu ati hnim deuh ruai a, ka dinna atang chuan Palayam kawtthler chu a lang phei ruih a, mi tam zawk chuan nihliap hi an keng fur bawk a. Kei pawh chu kawtthler lun takah chuan ka kalna lam tur Friends Counter, Building liantak, kawtthler tawp a ding luah lam pan chuan ka dinna Bus stand atang chuan ka phei ve chhat chhat a. Dar 10:47 chiah ani, Friends Counter ah chuan University Exam Fee pe tur chuan ka thu ve ta ran a. Mi an thathnem em avang erawh chuan a ninawm vei khawp mai. Ka Token,ka hum thlan dap tawh chu ka han en tha leh a,No.686 tih lo in chhu kalh leh bangkil tawp Screen a an koh mek No.530 lo lang nen a ka han chhut in hun ka la ngah hi tiin pawnlam ah ka va chhuak leh rih a..ka luh leh hunah chuan Tungchho a kal te lenna khawvel, siamtu in thiam taka a duan a ropuina leh amawina, amah fak a banglo a zaitur ka nihzia te ka hriat chhuah phah na tur ka tawng dawn tih reng ka hre silo.
Counter ah chuan lut lehin rei nghak tawh lo in ka No.an kohna lam panin ka phei a, harsatna awmlo in pawisa te ka han pe fel a. Receipt nghak a ka din lai chuan an Printer chu a chiang lo ta tlat mai..chutia tihtur neilo a ka din lai chuan ka dinglam sir a Nula lo ding chu ka mitsir chuan a hmu thei a, amah hmu chiang tura ka va hawi phei nak chuan..ani, ka tana thilmak, sawi hleihtheihloh chu!! KAREI..Greek tawng te pawh a sawifiah thiam loh tur, Nunna hial pe theitu ni a mawi, duhawmna in a tuamkhah, vani an rah sen mawi tak te leh Rose par te pawhin chibai an buk hial tur a mawi chuan ka mit ah tak mai chuan a rawn chhun tak ni..ka thil hmuh chu a tak ngei ani nge ka mitvai zawk tiin ka tarmit chu lathla in ka mit ka han nuai a, mahse ka mitvai zawng ani hauhlo, ani lullo, ka Tarmit, a Power -2.25 chuan dawt a sawi tlat lo..”Tho la ding ta che, i hliam adam e” tih hlate lo sa ve fo tawh thin mah ila, he hun ah zet hi zawng tho lo zawk in a hma ah tak chuan thingthit ruap mai tak ka nap a..
A mitmeng mawi, fiahfai lutuk te, a hnarngul in vuah dik lutuk te leh a heh no nalh lutuk fawh chak awm ngawih ngawih te chu kei tlangval naran, Kahpathir tluk a chang thinlung nei si lo tan zawng tawrh zawh chi rual ani lo. A pianphung, a ke ler atanga a chhip thlengin, a kut tang mawi nalh lutuk te, a pangkai hmatheh bawr nalh tawk lutuk te leh amawina ti zualtu atan a a sam chhawl a kawng thleng lo tawk, ngil siau mai te chu kei Engineering zirlai tlangval hian a Ratio leh a Proportion zawng a ka han dah pawhin approximate tih leh han Round off tur pakhat mah ka hmulo. Khawilai Professor putar ten he lai ah hian 0.001 in i siamtha ang hmiang pawh rawn tise, a tul ka tih lohzia leh a dik famkim zia ka lantir theihna anih dawn pawt chuan Pu Zorama Sorkar hnuaia District ngiata chawnghei te nghei chen zet chu chawnghei ka huam ngei ang.
Chu nula, duhawmna a khat chu a hming ka hriat loh avang leh amah chu Zohnahthlak kan tih zing a chhiar chi anih si loh avang in PRYANKA tiin a hming ka phuah sak ta ngawt a, Sap Mingo ho hminga ka ko dawn anih chuan Angel ka ti ngei ang..Zohnahthlak hming te ka put tir dawn anih ngai phei chuan Sangte ti a ka koh thawp sat tur ani..Ani, ka ti leh pek thin ang, Sakawrchunga chuang a, lukhumparh khumin Rampalaileng a Bawng vengtu pawh ni ila, Aw..ka bawih SENORITA ka la ti zel ta fan ang.
Kan sual te tlengfai turin Isua Krista chu he leiah Pathian in a rawntir a, amah chu Lal leh Chhandamtu ani tih ring a pawmtu ka ni..Ka hma a nula ding chu ka han thlir nawn leh a, Bible ah a Fanu a rawn tirh thu a awm bawk silo. Aw..ka Pryanka i chuan ka beng bulah zawi sap hian sualpuanna i nei ang hmiang te han ti ta mai se, Nursery kan kal laia kan hotu, Nu Chhawii chhuah lawk hlan a Bawnghnute dip leh Chini kan bar ruk thleng te khan ka puang fai kelh duh ngei ang. Hetiang khawpa mawina leh duhawmna hi Nu Chhul chhung a a in siam thei anih ngai si chuan Hindu sakhaw rinna vuantu tan chuan a hringtu nu Chhul pawh chu Pathian pakhat a chhiar tlak ngei zawng ani..Hun liam tawh hnu ka thlir kir a, Zohnahthlak lanu ngei tih ka lo sak ve tawh thin te chu kei ka tan zawng sak a va in thlahrunawm ta em..
Ka lei taksa chu tih danglamin a awm a, boruak a thlawk a leng delh delh ni hian ka in hria a, ral hla tak atang hian Aw ri in Cheta a rawn tih chu ka hre thei vuai vuai a, mahse ka boruak tawn chu a san em avang chuan ka ngaihsak theilo ani, Mahse..mahse..ka beng bulah, Cheta..Cheta, ti a ring taka min kohna leh ka koki hial a an rawn sawi taka chuan ka harh chhuak ta hlawl a, Counter nghaktu pa chuan ka Fee pekna receipt min pek pah chuan mak tih hmel tak hian mi melh hra a..Ka lei Taksa, vaivut a a kir leh hnu a, ka thlarau in vanram kawtthler a fan hun pawh a a hlimthla a chhawm zel tur ka senorita chu kham lo leh ui em em chung in ka hriat phak tawk lek in Mangtha ka ti ta a..Atawp nan vawikhat leh chauh pawh ti a hawikir ngam tawh lo in Friends Counter chu ka chhuahsan ta a..